Зменены тарыфы на паслугі паштовай сувязі агульнага карыстання

Міністэрствам антыманапольнага рэгулявання і гандлю Рэспублікі Беларусь прынята пастанова ад 17 жніўня 2023 г. № 48 «Аб змяненні пастановы Міністэрства антыманапольнага рэгулявання і гандлю Рэспублікі Беларусь ад 13 лютага 2017 г. № 12», якая прадугледжвае ўстанаўленне новых тарыфаў на паслугі паштовай сувязі агульнага карыстання.

Тарыфы на паслугі паштовай сувязі агульнага карыстання павысяцца ў наступных памерах:

• перасылка простай паштовай карткі, пісьма, бандэролі вагой да 20 грам – на 8 капеек для фізічных асоб і на 6 капеек для юрыдычных асоб, індывідуальных прадпрымальнікаў;
• за кожныя наступныя поўныя або няпоўныя 20 грам масы пісьма, бандэролі – на 1 капейку для фізічных асоб і на 0,83 капейкі для юрыдычных асоб, індывідуальных прадпрымальнікаў.

Даведачна: раней тарыфы на паштовыя паслугі павышаліся ў красавіку 2022 г.

Рашэнне аб пераглядзе тарыфаў у названых памерах прынята ў рамках запланаванага павышэння рэгуляваных цэн і тарыфаў у 2023 годзе ў мэтах забеспячэння кампенсацыі аператарам паштовай сувязі эканамічна абгрунтаваных затрат пры аказанні гэтых паслуг.

Пастанова ўступае ў сілу з 1 верасня 2023 г.