19 ЧЭРВЕНЯ 2019 Г. У МАРГ АДБЫЛАСЯ СУСТРЭЧА З МІНІСТРАМ ГАНДЛЮ І ПРАМЫСЛОВАСЦІ ЕГІПТА АМРАМ НАСАРАМ

У рамках афіцыйнага візіту 17 – 19 чэрвеня 2019 г. у Рэспубліку Беларусь Прэзідэнта Арабскай Рэспублікі Егіпет А.Ф. аль-Сісі, 19 чэрвеня 2019 г. у Міністэрстве антыманапольнага рэгулявання і гандлю адбылася сустрэча сустаршыняў Беларуска-Егіпецкай сумеснай гандлёвай камісіі: Міністра антыманапольнага рэгулявання і гандлю Рэспублікі Беларусь Уладзіміра Калтовіча і Міністра гандлю і прамысловасці Арабскай Рэспублікі Егіпет Амра Насара.

У ходзе сустрэчы бакі абмеркавалі актуальныя пытанні двухбаковага ўзаемадзеяння ў розных галінах: гандлю і інвестыцый, прамысловасці, IT-тэхналогій, сельскай гаспадаркі, турызму і інш. Асобна егіпецкім бокам адзначана дасягнутая дамоўленасць аб актывізацыі супрацоўніцтва ў сферах культуры і адукацыі.

Асаблівая ўвага на сустрэчы нададзена абмеркаванню практычнай рэалізацыі падпісаных 18 чэрвеня 2019 г. найважнейшых дакументаў, якія вызначаюць далейшы вектар беларуска-егіпецкага супрацоўніцтва: Комплекснай праграмы («Дарожнай карты») развіцця супрацоўніцтва паміж Рэспублікай Беларусь і Арабскай Рэспублікай Егіпет на 2019 - 2020 гады, а таксама Мемарандума аб узаемаразуменні паміж Міністэрствам антыманапольнага рэгулявання і гандлю Рэспублікі Беларусь і Міністэрствам гандлю і прамысловасці Арабскай Рэспублікі Егіпет аб стварэнні Беларуска-Егіпецкага Савета дзелавога супрацоўніцтва.

Дасягнута папярэдняя дамоўленасць аб правядзенні ў г.Мінску ў 2019 г. шостага пасяджэння Беларуска-Егіпецкай сумеснай гандлёвай камісіі, у рамках якога запланавана правядзенне першага пасяджэння створанага Савета дзелавога супрацоўніцтва.